(Du kannst de Schrift in platt nich lesen, du must dat schnacken und tolustern, denn versteihst du dat. Nu mal ran: )
Wi schüllt de Umwelt schonen, se in Ruh laten. Und wi möt wat gegen dat Toschannen maken doon. So studeert wi dat und höört wi dat alle Dage. Man vääle Lüü kümmert dat bloots en Spier oder gor nich. Ehr Egensinn glöövt nich an eene Welt de twei is.
Dormit dat anners ward, stüüt dor de Ökohoff in Iffens in Butjaarland gegen an. Iffens in een Lüttje Buurschap an den Jadebusen twuschen Werser und Jaa. De Hoff is een Freesch Gulfhuus, und he steit nu al över 130 Jahr. De Hoff wiest van oole Tieden, as een Koppel Peer un Keu an den Sommerdag up de fette Masch grasen weern und denn winterdags unner dat groote Dak Upstallt wurn.
Nu is dor Wolfgang und een paar annere Lüü up den Hoff: Bärbel is en Diplom-Mestersche und twee Deerns mokt Praktikum. Wolfgang is een studeerten Chemie-Doktor und hett mit de Lüü up den Hoff dat Gulfhus in de verläden tein Jahr verwannelt. Dar is een Harbarg för Froons un Mannsminschen, junge und oole, de Natur ton Anfaten un Begriepen beleäwen wüllt.
Woor fröher de Gropengang för de Beester weer, dar sünd nu moi inne Reeg de Slaapkammern föör den Besöök. In den oolen Päärstall kannst du nu Vördräge tolustern. De Päärkrippe ut Steen an de Wand is ok dar un vertellt van de oole Tiet. Chemikantenköök un een dunkelt Fotoschap sund in de Facken inricht. De Hill und Heufacken sund mit Schrievkraams un Schriften vullpackt. En Archiv is dor ok. Ehr Freetiet beläwt de Öko-schölers up den Huusböön unner de Hahnenbalkens. Mannich een Oort von Musik kannst dor tolustern.
Wolfgang und sien Helpslüü wiiest de Minschen wo dat
geiht mit spälen und utprobeeren und allens mittomaken. De Statschoon
in Iffens is vandagen en lüttje Buerei, de sick sülbens mit Eeten
versorgt. Denn gift dat noch een Backstuuv, een Sauna, Gewächshuus
mit Regenwatersoot, een Schüür mit Fahrröör, Warkstää
för Handwarken, een Stall mit dartig Schaap, Hööner und
Aanten un een grooten Huusgoorn mit Grööntüüch. In
den Kruuthoff wasst Brennetteln, Hoffwumken, Kruuse Menten, Hunnebloomen
und annere wille Planten. Dat is meist Natur pur! Dat Rababerbeet is bannig
groot,so groot as mien eegen Huusgoorn - un de is nich lüttjet. Von
den väälen Rababer mokt de in Iffens ok moien Rababerwiin. Dat
Rookschap mutt ik noch uptelln. Dar hangt winterdags de Wurst un Schinken
in.
Wat spält sick in Iffens af? Wat maakt de Seminaristen as Ökologen?
Se beläwt in Kursen de Natur, so as se heel in de Reeg is, mit veel
Schiet un Chemie und mit veel Spooß. Se koomt dar achter, dat wi
Minschen elk en daag mehr toschannen maakt, as wi glöben wüllt.
De Schölers sind Studenten und Mesters, Lüü vant Amt oder
ut dat Handwark, meist dusend elk een Jahr. Se probeert veele Saken bi
Wind un Wäer, de Natur upt Land un int Water.
Se stappt int Watt un röhrt den Slick um. Se unnersökt dat
Lotels utn Graben, de Jauche upn Acker und se föhrt mitn Rad dör
Butjahrland. Du kannst in Iffens ok een Ökoschiin maken, dat is so
wi den Schien för de Jägers oder de Schwimmers.
Up den Hoff in Iffens gift dat ok Späälwark. Tein Spääle hebbt de Lüü all utmickt. Se Schrievt för dat Blatt un in Böker.
De Lüü up den Hoff in Iffens heppt noch vääl vor. Neue Wiesen dat Huus warm to maken, Idee för den Besöök in Butjahrland, een beten wat up Platt, de Geschicht mit dat Friesische an de Küst, und ok sülbens Beer maken wüllt se. Ik wünsch jo all vääl Glück darbi.